بتديت قرايه فى الكتاب اللطيف ده الكتاب بيتكلم عن الطفل الداخلى وبيرد على سؤال معظمنا بيسأله هو ايه الطفل الداخلى؟
الكاتب بيقول ان الطفل الداخلى مش طفل حقيقيى هو تعبير رمزى لجزء عميق فى شخصيتنا اتكون نتيجة خبراتنا اثناء الطفولة يعنى هو جزء موجود فى اللاوعى مخزنين فيه خبراتنا الايجابية والسلبية اللى حصلت فى الطفولة الجزء ده مين اللى ساهم فى تكوينه؟بالتاكيد الاب والام والاشخاص المقربين من الطفل ووفقا للى حصل وقت الطفوله بيكون عندنا نوعين من الطفل الداخلى يا اما سعيد او مجروح
هل احنا جوانا طفل داخلى واحد مجروح فقط او سعيد فقط؟الحقيقة لاكل واحد فينا جواه الاتنين لكن واحد فيهم هو اللى بيكون غالب على الثانى
احدد ازاى مين فيهم اللى ظاهر فى حياتى فى الوقت الحالى؟بحدد من خلال تصرفاتى وانفعالاتى
هل مش بعرف اقول ولا ولا بقدر احط حدود للاخرين
هل دايما بانب نفسي
هل بشوف نفسي لا استحق الحب
هل انا شديد التنافس
هل بتعصب بسرعه لامور لاتستحق
لو بعض العلامات دى موجوده فيك اعرف ان تصرفاتك بتكون نابعه من طفل داخلى مجروح طب اعمل معاه ايه
الكتاب بيقول ان كل واحد فينا فى طفولته عنده ٤ احتياجات اساسيه اذا لم تلبى بشكل متزن بتاثر على شخصيته وعلاقاته فى المستقبل
١- الحاجه الى التعلق: او اننا نحس بانتماء وقبول من اهلنا والمقربين مننا وبيبان من اهتمام الاهل بأبنائهم والرسائل العكسيه بتوصل من الاهمال او الرفض والتعنيف ولو وصلتلنا الرسائل العكسية بيفضل شعور الرفض مصاحب لينا وبياثر على علاقاتنا فتلاقى نفسك بتهرب من العلاقات اللى فيها قرب او حميمية او بتدخل علاقات ودايما تفشل فيها
٢- الحاجة الى الاستقلالية والامان:حرية الطفل فى الاستكشاف والاعتماد على نفسه هى رغبه فطرية سيطرتنا على بعض الامور فى حياتنا هى مصدر للامان لو اتصادر على الرغبة دى عند الطفل هيكبر ويكون شخص مش قادر يعتمد على نفسه واحيانا اعتمادى او متمرد بشكل كبير لانه بيبحث عن الحرية اللى اتحرم منها
٣- الحاجة لتحقيق الرغبات:اشباع رغبات الطفل بتحتاج مرونه كبيره واتزان من الوالدين كانها موازنه بين المنع والتدليل الزائدين والاتزان بيولد انسان قوى الارادة واقرب للنجاح
٤- الحاجة الى الاحترام وتقدير الذات:الطفل بيبنى تقديره لذاته من احساسه بانه مرغوب من والديه وبيطور احترامه لذاته من معاملتهم ليه ولو محستش بالتقدير وانت طفل هتفضل تبحث عنه باقى حياتك من مصدر خارجى